ایک نیوز:ملکی معاشی اشاریے بہتری کی جانب گامزن،تاہم مہنگائی میں اضافے کا خدشہ ہے،کرنٹ اکاؤنٹ سرپلس،ترسیلات زر، برآمدات میں بھی نمایاں بہتری ریکارڈ  کی گئی ہے، اپریل میں مہنگائی کی شرح ڈیڑھ سے دو فیصد تک رہنے کا امکان  ہے،  مہنگائی کی شرح آئندہ ماہ تین سے چار فیصد تک ریکارڈ کئے جانے کا تخمینہ  ہے،وزارت خزانہ نے ملکی معیشت سے متعلق ماہانہ رپورٹ جاری کر دی ہے۔

وزارت خزانہ کی جاری کردہ رپورٹ  کے مطابق پہلے 9 ماہ میں کرنٹ اکاؤنٹ ایک ارب 85 کروڑ ڈالر سرپلس رہا، ترسیلات زر 33 فیصد اضافے کے ساتھ 28 ارب ڈالر سے تجاوز کر گئیں، اسی عرصہ کے دوران برآمدات 24 ارب 66 کروڑ ڈالر ریکارڈ کی گئیں، جولائی تا مارچ ٹیکس آمدن میں 25 فیصد اضافہ ہوا، اسی عرصہ کے دوران نان ٹیکس ریونیو 72 اعشاریہ نو فیصد اضافہ ہوا، نان ٹیکس ریونیو کا حجم تین ہزار 933 ارب روپے رہا۔

رپورٹ میں کہا گیا کہ صنعتی و زرعی شعبوں میں آئندہ مہینوں میں بتدریج بہتری متوقع ہے،براہ راست غیرملکی سرمایہ کاری میں 14 فیصد اضافہ ریکارڈ ہوا،براہ راست غیر ملکی سرمایہ کاری کا مجموعی حجم ایک ارب 64 کروڑ ڈالر رہا، ماہ مارچ کے دوران 58 ہزار 55 افراد روزگار کے لیے بیرون ملک گئے، فروری کے مقابلے میں اوورسیز ایمپلائمنٹ رجسٹریشن میں 17 فیصد اضافہ، آٹو موبائل کی پیداوار اور خام مال کی درآمدات میں بھی بہتری آئی ہے۔

وزارت خزانہ  کی جانب سے کہا گیا ہے  کہ  آنے والے مہینوں میں زرعی شعبے میں بھی بہتری کی امید ہے۔